كل يوم

Tweet

بيصحى كل يوم الصبح وبيحاول يخلي اليوم يحتفظ بإشراقه, بيحاول بجد من قلبه يبتسم عشان ميفعصش نفسه ولا الناس اللي بيحبهم ويخسر أكتر من اللي خسره, بيصحى كل يوم عايز يحقق حاجات بيحلم بيها بسيطة مهما كانت مش أحلام كبيرة قوي.

بيصحى وعارف إن كل المشاكل هيجيلها وقت تتحل لوحدها عشان يمكن يكون في اختبار وعارف إن الدنيا من حواليه مش أحسن مايكون, بيصحى وعارف إن عليه حاجة لازم تكمل وبيفكر نفسه دايما إن فيه ناس بيحبوه بيشيلوا وبيهونو عليه مهما بيحصل.

بيصحى ومش غاوي دراما وعايز يتدفى بضحك الناس ووجودهم اللي فرق في حياته كتير.

بيصحى نفسه يكمل شغله اللي بيحبه وبيتحمل بسمته ووجعه ونفسه يشوف ليه نتيجة تفرق في حياة الناس وحياته, بيصحى نفسه فعلا يغير الدنيا كلها.

مشاكله مش كتير وفيه منهم مش مشاكل بالنسبة لناس كتير, الحياه فيها مشكلات اكبر, بس على قد احتمال وتجربه كل واحد بتيجي مشاكله, المشاكل مش دايمة, الصحاب والكلمة الحلوة والإحساس الصادق هو اللي دايم, بيصحى وهو مؤمن بكده بس مش كلنا بنقوا على مواجهة ده كل يوم.

بيصحى وهو مقرر انه مش هيتجر للحفرة اللي بتحذره منها اعز اصدقائه وبيبعد بيبعد عايز يأمن نفسه, بيجري بعيد عن الحفره بس يمكن بيجري وهو باصص وراه بيشوف بيبعد قد إيه عشان كده أي حاجة صغيرة ممكن تكعبله, حتى ده مش عيب, بيقوم وبيحاول تاني وتالت ورابع وبيكمل..

بيصحى ونفسه يقدم حاجة للناس اللي بيحبوه ويخليهم سعدا لمجرد انه سعيد بجد, مش دايما بيقدر, لما بيتكعبل بيفكر في بكرة بس ده بياخد شوية وقت.. بيبقى بس عايز يقعد يرتب أوراقه, بيتلخبط مع إنه واثق من يقينه.

لما بيقع بيبقى عارف إن الأيادي اللي ممدودة كلها بتحبه عايزة تشده وهتفضل تشد, بس مش هو اللي بيتحكم هنا, عنده رد فعل لا ارادي.. بيحاول يحمي نفسه وكتير بييجي في الناس اللي مينفعش ييجي فيهم.. عمره ماأخد باله ولما أخد باله حب يغير بس بالراحة.

مش مسأله كرامة بس لما تتعود كل حياتك تبقى لوحدك وبتعمل كل حاجة لنفسك من غير مساعدة حد مش هتعرف تستقبل كل حاجة بدون متيجي على حساسية كرامتك اللي محدش بيمسها.. مشاكله ساعات تنقح لما يحس إنها كمان ممكن تعمل لحد تاني مشكلة, يعني كتير بتكون عبء عليه.. مابالكم بالناس..
بيبقى عايز بس يبعد عشان بيحس انه عبء على اللي بيحبوه, هيبعد يوم بس عشان يرتب أوراقه وأولوياته وافكاره ونفسه ويطبطب عليها, ودي عملية مرهقة.. بيبقى ساعات عايز يصرخ بس مش قادر, بس كله بيعدي وبينام عشان يصحى زي كل يوم عنده شوية امل انه يغير بإيده, ودي مش حاجة سهلة.. دي حاجة مرهقة قوي قوي قوي...

والدنيا بتكمل كل يوم وبيصحى.